2023-2024 სასწავლო წელს საქართველოს საჯარო სკოლებში ჭადრაკის გაკვეთილები ტარდება.
მოსწავლეთა ანალიტიკური, ლოგიკური, კრიტიკული აზროვნებისა და პრობლემების გადაჭრის პრაქტიკული უნარების გასავითარებლად დაწყებითი განათლების პირველ და მეორე კლასებში ჭადრაკი სავალდებულო საგნად ემატება.
ქალაქ ნინოწმინდის მე-3 სკოლის დირექტორის, არმენუი კარსლიანის თქმით, სპორტის გარდა, პირველი და მეორე კლასის მოსწავლეები ჭადრაკის გაკვეთილს კვირაში ერთხელ ესწრებიან. ჭადრაკი ახლა გახდა ბავშვთა განათლების განუყოფელი ნაწილი, მათი სასკოლო ცხოვრების დასაწყისიდან. ჭადრაკის გაკვეთილები ხელს უწყობს მნიშვნელოვანი თვისებების განვითარებას, როგორიცაა წარუმატებლობის გადატანა და რთული სიტუაციებიდან გამოსავლის პოვნის უნარი. ჭადრაკი ასწავლის ბავშვებს დაგეგმონ თავიანთი მოქმედებები, მონდომებით ისწავლონ და იმუშაონ მიზნის მისაღწევად.
უნდა აღინიშნოს, რომ ჭადრაკი არა მხოლოდ ინტელექტუალური თამაშია, არამედ სპორტიც. საჭადრაკო ტურნირებში მონაწილეობა ავითარებს სპორტულ უნარებს, აძლიერებს ფიზიკურ ჯანმრთელობას და ხელს უწყობს დისციპლინისა და თვითდისციპლინის ჩამოყალიბებას.
ჭადრაკი აუმჯობესებს მოსწავლეთა მრავალმხრივ უნარებს, როგორიცაა: ყურადღება, კონცენტრაცია, მეხსიერება, ანალიზი, ლოგიკა, გადაწყვეტილების მიღება, ორიენტაცია სივრცეში და მრავალი სხვა. ეს, თავის მხრივ, პირდაპირ კავშირშია მათემატიკისა და სხვა საგნების სტანდარტებით განსაზღვრულ კომპეტენციებთან.
ცნობისთვის, ეროვნული სასწავლო გეგმის მიხედვით, ჭადრაკის, როგორც პირველკლასელთა სავალდებულო საგნის შესწავლა პირველად 2022-2023 სასწავლო წელს გახდა შესაძლებელი. შესაბამისი გადაწყვეტილება ყოფილმა მინისტრმა მიხეილ ჩხენკელმა მიიღო. 2023-2024 სასწავლო წელს ეს პროგრამა ფართოვდება და ჭადრაკს მეორე კლასის მოსწავლეები სავალდებულო საგნად შეისწავლიან.
