მასალა მომზადებულია SKNEWS-ის მიერ
სახალხო დამცველის აპარატის წარმომადგენლებმა, 16 იანვარს, ახალციხის ახალგაზრდულ ცენტრში შეხვედრა გამართეს, სადაც ეთნიკური უმცირესობებით დასახლებულ მუნიციპალიტეტებში, განათლების კუთხით არსებულ გამოწვევებზე ისაუბრეს.
,,ჩვენ ვსწავლობთ ეთნიკური უმცირესობების უფლებრივ მდგომარეობას საქართველოს მასშტაბით. ამ მიზნით დავდივართ იმ მუნიციპალიტეტებში, სადაც ეთნიკური უმცირესობების წარმომადგენლები კოპფაქტურად ცხოვრობენ. ვიკვლევთ რა შეიცვალა, რა გამოწვევებია და რა გაუმჯობესდა. ჩვენ ამჯერად ფოკუსირებული ვართ ეთნიკური უმცირესობების განათლებაზე და ბილინგვური სწავლების რეფორმებზე. როგორ ხორციელდება სახელმწიფო ენის სწავლება ეთნიკური უმცირესობობებით დასახლებულ რეგიონებში, ასევე მათი ინტეგრაციის საკითხებსა და ინფორმაციის ხელმისაწვდომობას“ – განაცხადა სახალხო დამცველის ანალიტიკური დეპარტამენტის უფრსომა, თამარ აბაზაძემ.
,,ასოციაცია ტოლერანტის“ ხელმძღვანელმა, ცირა მესხიშვილმა იმ პრობლემაზე ისაუბრა რის გამოც, ნინოწმინდის მუნიციპალიტეტის სოფელ გორელოვკაში სახელმწიფო ენის ცოდნის დონე ძალიან დაბალია.
,,სოფელი გორელოვკა ძირითადად დუხაბორებითაა დასახლებული, რომლებიც 1947–1948 წლებში იძულებით გადმოასახლეს რუსეთიდან. ეს ადამიანები საქართველოს მოქალაქეები არიან, მაგრამ იმის გამო რომ რუსულ სკოლას ამთავრებენ, საერთოდ არ იციან სახელმწიფო ენა, ზოგიერთმა წერა–კითხვაც არ იცის ნორმალურად. გარდა ამისა, იმ მოსწავლეებს, რომლებიც რუსულ სკოლებს ამთავრებენ არ ეხება 4+1 პროგრამა, რის გამოც სომხურენოვანი და აზერბაიჯანულენოვანი მოსწავლეებისგან განსხვავებით, ქართული ენის დამატებით სწავლის შესაძლებლობაც არ ეძლევათ და იძულებულნი ხდებიან დამატებით მოემზადონ რეპეტიტორებთან. აქედან გამომდინარე, ეს ახალგაზრდები ვერ აბარებენ უმაღლეს სასწავლებლებში, ჩემი ინფორმაციით არცერთი მათგანი არ სწავლობს უმაღლესში და ისინი ძირითადად კოლეჯებში სწავლობენ“, – ამბობს იგი.
ასევე განიხილეს ახალქალაქის მუნიციპალიტეტის სოფელ ხავეთის პრობლემა, სადაც ახალციხის ახალგაზრდული ცენტრის წარმომადგენლების განმარტებით, ინგლისური ენის პედაგოგის პრობლემა მუდმივად აქვთ. ამ პრობლემას კი სოფლის მკვეთრად გამოხატული იზოლირებული მდგომარეობა და დასახლებამდე მისასვლელი რთული საავტომობილო გზები იწვევს.
ახალგაზრდული ცენტრის წარმომადგენლები ასევე საუბრობენ ჯავახეთის სოფლებში ქართული ენის პედაგოგთა არასაკმარის რაოდენობასა და მათ არაკვალიფიციურობაზე. მათი თქმით, სახელმწიფო ენის ცოდნის დონე არამარტო მოსწავლეებშია ძალიან დაბალი, არამედ პედაგოგებშიც.
სახალხო დამცველის ანალიტიკური დეპარტამენტის უფროსის, თამარ აბაზაძის თქმით, მსგავსი შეხვედრები უკვე ჩატარდა ქვემო ქართლის ეთნიკური უმცირესობებით დასახლებულ მუნიციპალიტეტებში და მომავალშიც იგეგმება.
