ბრძოლა დემოკრატიისა და ჩვენი ქვეყნის ევროპული მომავლისთვის – ედიკ კამალიანი

ავტორი რიმა მარანგოზიან
– “დღევანდელი ხელისუფლება აშკარად და დაუფარავად უგულებელყოფს საქართველოს კონსტიტუციას და ქვეყნის ევროინტეგრაციისკენ მიმავალ გზას”, – აცხადებს “ალიქ მედიის” სტაჟიორი ჟურნალისტი ედიკ კამალიანი. მან “რუსული კანონის” მიღებისა და მისი შედეგების შესახებ საკუთარი ხედვა გაგვიზიარა.
– “საქართველოში დემოკრატიული განვითარების პროცესები და ევროინტეგრაციის პერსპექტივა პირდაპირ საფრთხის ქვეშ დგას – ამის ერთ-ერთი ყველაზე თვალსაჩინო მაგალითი “რუსული კანონის” მიღებაა”, – განმარტავს ედიკ კამალიანი.
კამალიანი აღნიშნავს, რომ “რუსული კანონი,” რომლის პირველადი მიზანი არასამთავრობო ორგანიზაციებისა და მედიის კონტროლი იყო, პირდაპირ ეწინააღმდეგება საქართველოს კონსტიტუციას.
– “ეს კანონი სერიოზულ ზიანს აყენებს სამოქალაქო საზოგადოებას და მედიის თავისუფლებას, რაც საქართველოს დემოკრატიული განვითარებისთვის კრიტიკულად მნიშვნელოვანია. იგი არა მხოლოდ დემოკრატიული ინსტიტუტების დასუსტებას, არამედ სამოქალაქო საზოგადოების და მედიის თავისუფლების შეზღუდვასაც ემსახურება”, – ამბობს ის.
კანონის კონტექსტი და გავლენა
– “რუსული კანონი ითვალისწინებს იმ ორგანიზაციების და პირების რეგისტრაციას, რომლებიც უცხოეთიდან ფინანსდებიან. ეს არის მექანიზმი, რომელიც პირველად რუსეთში შემოიღეს, რათა ჩაეხშოთ კრიტიკული ხმები”, – ამბობს კამალიანი.
მისი თქმით, მსგავსი კანონის მიღება პირდაპირ საფრთხეს უქმნის იმ არასამთავრობო ორგანიზაციების ფუნქციონირებას, რომლებიც მოწყვლადი ჯგუფების უფლებების დაცვაზე მუშაობენ:
– “ეთნიკური უმცირესობები, შშმ პირები, ძალადობის მსხვერპლი ქალები და ბავშვები – ეს ჯგუფები სწორედ საერთაშორისო დონორებისა და ადგილობრივი ორგანიზაციების მხარდაჭერაზე არიან დამოკიდებული”.
კამალიანი ხაზგასმით აღნიშნავს, რომ კანონის მიღება აშკარად არის ანტიდასავლური პოლიტიკის ნაწილი, რომელსაც საქართველოს დღევანდელი ხელისუფლება ატარებს:
– “ანტიდასავლური პროპაგანდის და დეზინფორმაციის გავრცელება არ შეჩერებულა. ამ ფონზე, საქართველოში კიდევ უფრო გაღრმავდა პოლიტიკური კრიზისი, რაც საზოგადოების პოლარიზაციაში აისახება”.
საზოგადოების პროტესტი და დემოკრატიული ბრძოლა
კამალიანი ხაზს უსვამს, რომ “რუსული კანონის” მიღებამ საზოგადოებაში პროტესტის ტალღა გამოიწვია:
– “მიუხედავად ხელისუფლების მხრიდან უგულებელყოფის, ქართველი ხალხი აჩვენებს, რომ მათთვის დემოკრატიული ღირებულებები და ევროინტეგრაცია პრიორიტეტულია. რამდენიმე თვის განმავლობაში უწყვეტი პროტესტი ამის ნათელი მაგალითია”.
მისი თქმით, დღევანდელი რეალობა საქართველოს ისტორიის ერთ-ერთი ყველაზე მნიშვნელოვანი ბრძოლაა:
– “ეს არ არის მხოლოდ კანონის წინააღმდეგ ბრძოლა – ეს არის ბრძოლა დემოკრატიის, თავისუფლების და ჩვენი ქვეყნის ევროპული მომავლისთვის”.
რა არის გამოსავალი?
კამალიანის თქმით, დღევანდელი კრიზისიდან გამოსავალი ახალი, თავისუფალი და სამართლიანი არჩევნების ჩატარებაა.
– “დღევანდელი ხელისუფლება არ არის ლეგიტიმური. ახალი არჩევნები არის ერთადერთი გზა, რომლითაც საქართველოს ხალხი შეძლებს თავისი ნება გამოხატოს და ქვეყნის დემოკრატიული განვითარება განაგრძოს”, – ამბობს ის.
– “მე მჯერა, რომ ქართველი ხალხი გაიმარჯვებს ამ ბრძოლაში”, – ასკვნის კამალიანი.
მისი შეფასებით, მიუხედავად არსებული გამოწვევებისა, ქართულ საზოგადოებაში ჯერ კიდევ ძლიერია დემოკრატიული და პროდასავლური ტენდენციები, რაც საქართველოს ევროპულ მომავალს იმედის ნაპერწკალს უტოვებს.